ஏமாற்றம்

விழி பயணித்த
தடங்கள் யாவும்
பாதம் பதிக்க
முடியவில்லை
முட்செடிகளாய் இருப்பதால்...
மனம் விரும்பிய
எண்ணங்கள் யாவும்
ஈடேறவில்லை
என்னவளாய் உன்னையும் சேர்த்து...
உதடு வெளிபடுத்திய
உணர்வுகள் யாவும்
பொய்யாய் போயின
இம்மாய உலகில்...

நீ

தொலை தூரப் பயணங்கள்
உற்சாகமாகியது
நீ என்னோடு பயணித்த வேளைகளில்...
இல்லம் சொர்கமாகியது
நீ என்னோடு கழித்த பொழுதுகளில்...
மகிழ்ச்சி ஆக்கியது
உன் வருகைக்காக மணிக்கணக்கில்
காத்திருந்த தருணங்களில்...

இன்று ஐந்து நிமிடப்
பயணம் களைபாகிறது...
வீடு நரகமாகிறது...
ஒரு நிமிட காத்திருப்பும்
வெறுப்பாகிறது...
நீ என்னோடு இல்லாத இவ்வுலகில்...

வாழ்க்கை

வாழ்க்கையை பின்னோக்கி
பார்க்கிறேன்...
அப்பா மட்டுமே என்
கதாநாயகனாக...
அம்மாவின் அணைப்பில்
மட்டும் தெரிந்த அன்பு...
அப்பாவின் தோளில்
என்னை சாய்த்துக்கொண்ட
தருணங்கள்...
உடன் பிறந்தவள் மட்டும்
என் விளையாட்டு எதிரியாக...
முட்டியில் ஏற்பட்ட சிராய்ப்புகள்
மட்டும் வலிகளாக...
பொம்மைகள் மட்டும்
உடைத்த பொருள்களாக...
புரிகிறது இப்பொழுது
காலம் மிகவும்
மாறிவிட்டதென்று ....

பள்ளி

தலைவாரி பூச்சூட்டி
சீருடை அணிந்து
பள்ளிக்கு தயார்படுத்தினாள்...
வழியில் பள்ளியில்
விட்டுவிடுமாறும் கூறினாள்...
என் மகளின் விருப்பதிற்க்காக
அவள் தயார்படுத்திய
பொம்மையோடு கிளம்பினேன்
அலுவலகத்திற்கு....

நவீன உலகம்

பயணிகள் நிழல்
குடைக்காக சாலையோர
மரங்களை வெட்டிச்சாய்த்தோம்...
அடுக்குமாடி குடியிருப்புக்காக
விவசாய நிலங்களை
அழித்தோம்...
மரங்களுக்காக
காடுகளையும் அழிக்கிறோம்...
நவீன உலகினை
உருவாக்க
இயற்க்கை அழகை அழித்து
செயற்கை அழகை
உருவாக்கும்
நவீன மனிதர்கள் நாங்கள்....

தனிமை

அலுவல் பணிகள் யாவும்
பிழையாய் போயின...
இல்லத்தில் இருந்த நேரங்கள்
தனிமைபடுத்தின...
வாகனம் ஓட்டுகையில்
கவனம் சிதறின...
சாலையில் நடக்கையில்
என் நிழல் மட்டும்
என்னோடு...
இவை யாவும் நீ
என்னுடன் இல்லாத
தருணங்கள்...

கடிதம்

நீல நிற காகிதமொன்றில்
தன் உள்ளத்தில் உள்ள
அன்பு வார்த்தைகளை கொட்டி
உறவுகளுக்கும்
நண்பர்களுக்கும்
அன்புள்ள என்று ஆரம்பித்து
அன்புடன் என்று முடிக்கும்
கடிதம் மிக அழகு....

அழகிய கிறுக்கலான
கை எழுத்துடன் தன்
கைப்பட எழுதும் கடிதம்
உணர்வுகளின் வெளிப்பாடு....

அன்பு அம்மாவிற்கும்
காதல் மனைவிக்கும்
பாசத் தங்கைக்கும்
உயிர் நண்பர்களுக்கும்
உறவுகளுக்கும்
எழுதும் கடிதம்
அன்பின் வெளிப்பாடு....

நவீன உலகில்
மனித இயந்திர
வாழ்க்கையில் கடிதம்
மறந்து மின்னஞ்சலாகிவிட்டன....

தொலைந்தது கடிதம்
மட்டுமல்ல
மனித உறவுகளுக்கு
இடையே உண்டான
அன்பும் பாசமும் தான்....

குழந்தை

உறக்கம் வர
அம்மாவிடம் கதை
கூறச்சொல்லி
படுத்து கேட்டுக்கொண்டிருந்தாள்
பிஞ்சுக் குழந்தை...
மறுநாள் பொம்மையை
அணைத்தபடி தான் கேட்ட
கதையை கூறிக்கொண்டிருந்தாள்
அந்த பொம்மையை
உறங்கச்சொல்லி....

*********************************************

வெளியில் கிளம்பிய
என்னை பார்த்து அழுத
குழந்தையை
சமாதானப்படுத்த
வீடு திரும்பும்பொழுது
மிட்டாய் வாங்கி வருகிறேன்
என்றேன்...
திருமணநாள் அன்று
கோவிலுக்கு அழைத்து செல்லாமல்
வீட்டிற்கு நேரம் கழித்து
வந்த என்னை பார்த்து
சிணுங்கிய மனைவியிடம்
அப்பா மிட்டாய் வாங்கி
வந்திருப்பார்
அழுகாதே என்றது
குழந்தை....
***************************************************

அம்மாவை பிடிக்குமா
அப்பாவை பிடிக்குமா
என்று கேட்டேன்
குழந்தையிடம்...
தன்னோடு எப்பொழுதும்
இருக்கும் கரடி பொம்மையை
தான் பிடிக்கும் என்று
கட்டிக்கொண்டது குழந்தை...
அலுவலகத்திலிருந்து திரும்பிய
எங்கள் இருவருக்கும்
சுரீரென்றது....
**************************************************

நண்பன் - அரவிந்த்

பள்ளி பருவத்து
நம் முதலாம் வகுப்பில்
வெய்யில் தாகத்தை தணிக்க
தண்ணீர் கேட்டாய் என்னிடம்...

நான் கொடுத்த நீர்
உன் தாகத்தை மட்டும்
தணிக்கவில்லை...
நம்முள் நட்பையும் திணித்தது...

அன்று வேரூன்றிய
நம் நட்பு மரமாய் நம்முள்
வளர்ந்து நிற்கிறது இன்று...

நாம் கவலையின்றி
அரைக்கார் சட்டையுடன்
சுற்றி திரிந்த இடங்களும்...
மிதிவண்டியில் சுற்றிய
வயல் காடுகளும்
திரை அரங்குகளும்
பறை சாற்றுகின்றன
இன்றும் நம் நட்பின் ஆழத்தை...

பள்ளியில் பிரிந்தும்
நம் நட்பு
கல்லூரி காலத்திலும்
நெருக்கமாய் தொடர்ந்தது...
வேலைக்காக இன்று நீ
வெளி நாட்டில் இருந்தும்
குறையவில்லை
நம் நட்பின் ஆழம்...

நீ என்னோடு இல்லாத
இந்த வெற்றிடத்தை
நிரப்ப உன்னையும்
நம் இளைமைக்கால
நினைவுகளையும் தவிர
வேறு எவராலும் முடியாது...

பின்னோக்கி பார்க்கிறேன்
நம் இளமை காலத்தை
ஏக்கத்தோடு...

வாழ்க்கை பாதை

கடந்து வந்த
வாழ்க்கை பாதையை
பின்னோக்கி பார்க்கிறேன்
நரைத்த தலையோடும்
தளர்ந்த உடலோடும்....

வெகு தொலைவில்
நீ தெரிகிறாய்
நாம் பிரிந்த
இளைமை காலத்தில்....

திரும்பவும் இளமையோடு
உன் கரம் பிடித்து
வாழ்க்கை பாதையை
கடக்க ஆசை....

ஆனாலும் ஒருவழி
பாதையாய் போய்விட்டது
இந்த வாழ்க்கை பயணம்
நாம் சேர வழி இல்லாமல்....

உறவுகள்

கண்டதும் பல
உறவு பெயர்களில்
அழைத்தார்கள்...
ஆனாலும் இவர்கள்
ரத்தத்தால் வந்த
உறவுகள் அல்ல...
கண்டப்பின் நம்மோடு
உறவாகிப்போனவர்கள்....

இவர்களை
பெற்றவர் யாராயினும்
வளர்வது ஓரிடத்தில்....

இவர்களிடம்
ஜாதி மதங்களை கடந்த
உறவும் பாசமும் நட்பும் தெரிந்தது....

பண்டிகைகள் எல்லாம்
சிறப்பாகின்றன இவர்கள்
கொண்டாடுவதால்....

இவர்கள் அனைவரோடும்
ஒரு வேளை
உணவு உண்டது
வாழ்கையில் செலவு
செய்த பணத்திற்கு
முதன் முதலாக
கிடைத்த சந்தோஷம்....

பிரியும்போது
தோன்றியது என்னுள்
இவர்கள் அனாதைகள்
அல்ல என்று
உறவாக நாமிருக்கும்போது....

நண்பர்கள்

பள்ளி கால நண்பர்கள்
அலுவலக பணியின்
தீவிரத்தில் காணாமல் போனார்கள்....

கல்லூரி காதல்
திருமணத்துக்குப்பின்
மறந்துபோனது....

வீடு அலுவலகமென்று
அன்றாட இயந்திர
வாழ்க்கை பழகிப்போனது....

அன்று அப்பாவின் திட்டு
நினைவுக்கு வந்தது
பொறுப்பற்று நண்பர்களுடன்
ஊர் சுற்றுகிறான் என்று...
நாங்கள் இன்றைய இளைஞர்கள்....

நம்பிக்கை

நட்டு வைத்த நாற்றுகளுக்கு
நீர் பாசனம் வேண்டி
மழை பெய்ய
காத்திருந்தான் விவசாயி....

அறுவடை பணத்தில்
வீட்டிற்க்கு அரிசி வாங்கவும்
பிள்ளையின் பள்ளி
கட்டணத்தை கட்டவும்
எண்ணமுண்டு....

கருத்த மேகத்தை பார்த்து
புன்னகை தவழ்ந்தது...
அடித்த ஆடி காற்றில்
மேகமும் கலைந்து
கவலையும் தொற்றிகொண்டது....

ஏமாற்றத்துடன் வீடு
திரும்பியவனிடம்
வருண பகவானை
வேண்டுவோம் என்றான் பிள்ளை...
மகனின் நம்பிக்கை
புத்துணர்ச்சி தந்தது
அவனுள் மழை வருமென்று....

மரங்கள்

சாலையின் இருபுறமும்
நட்ட செடிகள்
வருடங்களில்
மரங்கள் ஆனது...
அனைவருக்கும்
நிழல் குடையாய்...
பறவைகள் வசிக்கும்
சரணாலயமாய் மாறின...
காற்றுக்கும் பஞ்சமில்லை...
வாகன நெரிசலை தவிர்க்க...
சாலையை அகலப்படுத்தும்
பணிக்காக வெட்டி சாய்த்தார்கள்
உயிருள்ள மரங்களை...
இதயம் கனத்தது...
விறகாகிபோன
மரங்களை பார்த்து....

காதல் நிறைந்த உலகம் - 5

காதல் நிறைந்த உலகம்

தினமும் அதிகாலையில்
நீ இடும் கோலத்தால்
வாசல் அழகாகிறது....
தினமும் நீ உன் கூந்தலில்
சூடிக்கொள்வதால்
பூக்கள் அழகாகின்றன....
தினமும் ஒரு முறையாவது
என்னையும் தொட்டு விடு
நானும் அழகாகிவிடுவேன்....

காதல் நிறைந்த உலகம் - 4

காதல் நிறைந்த உலகம்

தமிழ் அகராதியில்
உன் பெயரை
சேர்த்துவிட்டு
அழகு என்ற
வார்த்தையை
நீக்கிவிட போகிறார்களாம்....

****************************************

காற்றாய் மட்டும்
நான் இருந்திருந்தால்....
உன்னை வருடிக்கொண்டே
இருக்கும் சந்தோஷம்
கிடைத்திருக்கும்....

****************************************

ப்ரியங்களுடன்
நேத்ரன்

காதல் நிறைந்த உலகம் - 3

காதல் நிறைந்த உலகம்

உன்னை சந்தித்தப்பின் வரும்
என் பிறந்தநாள் மட்டுமே
பிடித்திருக்கிறது
நீ என்னை வாழ்த்துவதால்....

*********************************************

உன் கை பிடித்து
அக்னி வலம் வருகையில்
என்னை கைவிட மாட்டாயே என்பது போல
கையை இறுக்கி பிடித்தாய்...
என் உயிர் உன்னோடு இருக்கையில்
உடல் மட்டும் எங்கு செல்லும்....

**********************************************
தலை குனிந்து பூமி பார்த்தே
வெட்கப்படும் நீ
நிமிர்ந்தும் வெட்கப்படு
நானும் ரசித்துவிட்டு
போகிறேன் உன் வெட்கத்தை....

**********************************************

ப்ரியங்களுடன்
நேத்ரன்

காதல் நிறைந்த உலகம் - 2

காதல் நிறைந்த உலகம்

நீ ஒற்றை ரோஜா
சூடிவந்தாலும்
என் மனதில்
ரோஜா கூட்டமே
வந்த உணர்வு....

************************************

உனக்காக காத்திருக்கும் நான்
ஜென்ம சாபல்யம் அடைந்தேன்
உன் ஒற்றைப் புன்னகையில்....

*************************************

நான் உன்னை காதலிக்கறேன்
என்றபொழுது பதிலுக்கு
நானும் தான் என்று
பளிச்சென்று கூறினாயே
அக்கணம் முதல்
நான் நீ ஆகிவிட்டாய்....

***************************************

ப்ரியங்களுடன்
நேத்ரன்

காதல் நிறைந்த உலகம் - 1

காதல் நிறைந்த உலகம்

நீ என் தோள்மீது
சாய்ந்து கொள்ள கேட்டாய்...
என் தோளே நீ
சாய்ந்து கொள்ளத்தான் என்று
உனக்கு தெரியாதா....

********************************************

உன் மேல் கொண்ட காதலினால்
உன் விருப்பங்கள் யாவும்
என்னுடயதாகி விட்டன....

********************************************
நிலவின் அழகில் பிரம்மித்திருக்கிறேன்
உன்னை காணும் வரை...
நிலவுக்கு செல்ல ஆசைபட்டிருக்கிறேன்
நிலா மகளாய் நீ வரும்வரை....

*********************************************
நாம் காதலிக்க ஆரம்பித்தப் பின்
என்னை தவிர வேறு
ஒருவரையும் பார்க்க
பிடிப்பதில்லை என்றாய்...
எனக்கோ பார்ப்பதற்கு
என்னையே பிடிப்பதில்லை
உன்னை தவிர....

********************************************
மீண்டும் வரும் என் பிறந்தநாளை
எதிர்நோக்கி ஆவலுடன்
காத்திருக்கிறேன் ...
நீ எனக்கு கூறும்
அந்த நள்ளிரவு
வாழ்த்து செய்திக்காக....

**********************************

ப்ரியங்களுடன்
நேத்ரன்

காதல்

காதல்...
பாம்பின் கொடியதொரு
விஷமாய் என்னுள் பரவி
பசிமறந்து
தூக்கமிழந்து
நிலை கண்ணாடி முன்
அடிக்கடி முகம் பார்த்து
தனிமையில் உன்னோடு உரையாடி
எழுதுகோல் பிடித்த போதெல்லாம்
உன் பெயர் கிறுக்கி
உன்னை கண்டப்பின்
காதல் பித்தனானேன்...